كشف أحمد سيد “زيزو” لاعب النادي الأهلي الجديد، عن كواليس انتقاله من الزمالك إلى القلعة الحمراء، في حوار مطول مع الإعلامي إبراهيم فايق على قناة MBC مصر، تحدث فيه عن موقفه من الجماهير، وسبب اختياره للأهلي، وموقفه من الكابتن محمود الخطيب، إلى جانب رأيه في الصفقات الجديدة، وأسباب رحيله عن الزمالك.
كواليس مكالمته مع الخطيب
وقال زيزو: “الكابتن الخطيب كلمني، وكنت سعيد جداً بمكالمته. قال لي: خليك زي ما أنت، مش عايزك تغيّر أي حاجة، وعرّفني على تفاصيل معينة وازاي أتعامل مع القصة، وأنا تشرفت بمكالمته ومبسوط إنه متطلع لحاجات كويسة.”
سر اختيار الرقم 25 مع الأهلي
وأكد زيزو أنه اختار ارتداء القميص رقم 25 مع الأهلي لعدة أسباب شخصية، قائلاً:”عيد ميلاد بنتي يوم 25، وكسبت أول بطولة كونفدرالية مع الزمالك يوم 25، وكان الرقم وشه حلو عليا.”
وأشار إلى أنه يفضل اللعب في مركز الجناح الأيمن أو رقم 8، موضحًا أن دوره مع المنتخب كان دفاعيًا في أغلب الوقت، مما جعل البعض يفسر قلة أهدافه بشكل خاطئ:”مع حسام حسن حصل تغيير، وكان ليا دور هجومي في المعسكر الأخير وسجلت هدفين.”
وتحدث زيزو عن اختياره الانضمام للأهلي رغم وجود عروض أخرى:”فضلت الأهلي لأنه نادٍ كبير، وجمهوره مرعب، ومفيش جمهور زيه. شرف لأي لاعب يرتدي قميص الأهلي.”
كواليس انضمامه إلى الزمالك من البداية
وفيما يتعلق بفترة تواجده في الزمالك، قال:”انضممت للزمالك في وقت كانت فيه أزمة في الفيزا، واتدربت في المنيا مع كابتن طارق السيد. بعد كده حصل تواصل مع أمير مرتضى ومسؤولين تانيين.”
وأضاف:”كنت محتاج الناس تعرف إن انضمامي للزمالك مش بالسهولة اللي الناس فاكرينها. اجتهدت على نفسي عشان أبقى معروف.”
وعن تفاصيل الأزمة الأخيرة مع الزمالك، قال:”لجنة التخطيط كانت فاكرة إن الأزمة مادية، لكن أنا قلتلهم مش فلوس بس، إحنا محتاجين نرجّع حقنا أنا ووالدي. معظم اللاعبين كانوا عارفين اللي بيحصل، واستغربت من رد فعل بعضهم.”
كما تحدث عن الأزمة المتعلقة بالسفارة، قائلاً:”موضوع السفارة كان غلطة مني. كنت فاكر إن الفيزا بتاخد وقت طويل، وخدت معاد تحسبًا لو جاتلي فرصة من أي نادٍ، زي العين. مكنتش أعرف إنه هيتسرب أو يتربط برحيلي.”
العلاقة مع محمد صلاح
وعن علاقته بمحمد صلاح، قال زيزو: “في تفاهم كبير بينا، لكن مفيش أي حديث بينا عن الانتقال للأهلي أو الزمالك.”
وتطرق زيزو إلى علاقته بلاعبي الأهلي، قائلاً:”علاقتي كويسة بالجميع، وأصحابي هما الشناوي، وهاني، وطاهر، وإمام، وأوفا، وبن شرقي، ووسام أبو علي، ومش عايز أنسى حد.”
وفي ختام تصريحاته، قال زيزو:”المنافسة داخل الأهلي صحية، وأنا جاهز طول الوقت. وان شاء الله أقدر أحقق مع الأهلي كل البطولات، خصوصًا دوري أبطال إفريقيا اللي معنديش في رصيدي.”
وأضاف: “أمام عاشور هو صفقة القرن، وأنا وهو واحد. متحمس جداً للفترة الجاية، وانتقالي للأهلي مش عادي، لكن الحكم النهائي للجمهور.”
