علق الكاتب الصحفي خالد صلاح، خلال صفحته الشخصية على «فيسبوك»، على مخاطر استخدام الذكاء الاصطناعي في الصحافة، وتقديمها معلومات خاطئة ومضللة، بالإضافة إلى تأثيره على حقوق الملكية الفكرية ونسبة القراءات للمواقع الصحفية.
قال صلاح: “خدوا بالكوا من اللي بيحصل دلوقتي في جوجل بسبب حاجة اسمها AI Overview، اللي بتظهر فوق نتائج البحث ، دي خاصية بتستخدم الذكاء الاصطناعي علشان تديك الإجابة على سؤالك من غير ما تدخل أي موقع يعني بدل ما المستخدم يضغط على رابط ويدخل يقرأ من مصدر صحفي أو موقع إخباري، بياخد الرد على طول من فوق، مختصر وجاهز”.
وتابع الكاتب الصحفي: “المشكلة هنا مش بس إن دي معلومات ممكن تكون مليانة أخطاء (في المثال اللي في الصور مع البوست جربت أكتب رئيس تحرير الأهرام و النتيجة قالت ماجد منير و ده حقيقي ، لكن جوجل عرض صورة علاء ثابت اللي مش في هذا المنصب حالياً ، يعني لو حد مش عارف مين دول هياخد معلومات خطأ وصور خطأ دو تحقق)”
وأضاف صلاح: “لكن القضية مش بس في الأخطاء والتضليل، الأخطر إن المواقع اللي تعبت وكتبت المعلومات والأخبار ونشرت الصور، والمفروض إن لها حقوق ملكية فكرية مش هتاخد حقها، يعني الإجابة السهلة اللي بتطلع دي هتقلل الزيارات والقراءات من المواقع الأصلية، وبالتالي تقلل عائد الإعلان على المواقع وده معناه ضرب مباشر في مصدر الدخل الأساسي لأي مؤسسة صحفية رقمية”.
واستكمل: “حضرتك مش محتاج أقولك إن ده بيهدد نموذج الصحافة كله ، و فيه تقارير من مؤسسات دولية بتقول إن بعض المواقع فقدت ما يقرب من 30% من زياراتها بسبب الخاصية دي ، ده غير إن google نفسها بتستخدم محتوى من المواقع من غير ترخيص أو احترام للملكية الفكرية”.
واختتم منشوره متسائلا: “إزاي الصحف تفضل تشتغل وتنتج وتدفع مرتبات لمحررين وصحفيين، وفي الآخر الذكاء الاصطناعي ياخد المحتوى ويقدمه للناس على طبق من دهب بتواطؤ علني وغير قانوني من محركات البحث ، ويضرب جوهر المعادلة المالية للصحف”.
